Top
مدة القراءة: 4 دقيقة

زوجك عصبي.. عنيد.. جلف.. قعيطي.. ما يحس.. زعول

زوجك عصبي.. عنيد.. جلف..  قعيطي.. ما يحس.. زعول
مشاركة 
19 سبتمبر 2009

زوجك عصبي.. عنيد.. جلف..  قعيطي.. ما يحس.. زعول.. يحب يجرحك….الخ: اذن تفضلي الحل الاكيد%

السلام عليكم ورحمة الله وبركاته

اخواتي الغاليات

الموضوع مبين… وماودي اطول عليكم

اذا كان زوجك فيه اي عيب… مهما كان مهما صار بينكم.. مهما كبرت المشاكل

أقدم لك هدية بسيطة كفيلة بإذن الله انها تنهي كل ذلك..

أنا هنا أكتب من واقع تجربه عشتها مع زوجي، ثلاث سنين من التنافر والخلافات وانواع الجروح والاهانات، كل عيوب الدنيا كانت فيه:



الصلاة في البيت والعصر يصليه مع المغرب

يحب يطلع من البيت وما يصدق يلقى فرصة للخروج

يتاخر لدرجة انه ممكن يجلس ست اوسبع ساعات برا

اذا رجع يا يناميا يطالع ام بي سي 2 - او فور - وقناته المفضلة روتانا سينما

وانتم اعرف ببلاوي هالقنوات؟

عصبي

غيور جدا جدا

منغلق

يحب التحطيم

ثقافته اي كلام كل ما اساله عن شي يفغر-واذا كان مرة مثقف قال مدري..

هوايته الضرب… والله عليه كفوف تخلي البيت يدور

مايحب يكشخ لي ابد ابد ابد.. واذا مرة كشخ لبس لي ثوب بدون شماغ..

المهم “خليتوني اغتابه وانا صايمة”سبحانك اللهم وبحمدك اشهد ان لا اله الا انت استغفرك واتوب اليك

يعني مافيه حيلة - ولابه امل- وعكسي تماما

عانيت الين ربي من علي بالدواء لكل ماسبق من بلاوي

وانا هنا اخص هالمنتدى الحلو بتجربتي لاني والله احب لكم الخير من قلبي

وحاسة بكل متزوجة زوجها غثيث

 

الحل والدواء يالغاليات هو:

1) الاستغفار: (والله العظيم اني شفت العجايب من الاستغفار-احاول كل ما اذكر استغفر مايهم كم العدد المهم قد ماتقدرين).

2) سورة البقرة: (يابنات عجيبة هالسورة - لها اثر فوري جدا ومن اول جزء حسيت زوجي تغير 180 درجة) حاولي كل يوم تقرأين جزء وترى موصعب الجزء يمكن ياخذ منك ثلث ساعة بالكثير وحاولي بعض الاحيان تقراين وزوجك موجود عشان يسمعك ويحس ويستحي على دمه ويقرا هو بعد.

ترى يا حلوات هالسورة عجيبة عجيبة عجيبة واللي تقراها وما يصير زوجها طيب معها تكتب لي وانا مستعدة احاول معها لين توصل للنتيجة.

3) الرواقة: خليك طوال اليوم رايقة عيشيش حياتك…اصحي متى ما صحيتي بدون منبه ولا خرابيط ”الا اذا فيه موعد صلاة” افطري احلى فطور افتحي قناة عالم حواء وتابعي احلى خلطات اسحبي ارجولك في المشي ”بس اذا جاء زوجك زيدي الحركة شوي لا يقول زوجتي عجوز” البسي احلى ملابسك وسرحي شعرك بطريقة عفوية تمايلي قدام المرايه واضحكي لها الوجه الصبوح ”يازينك”

4) دلعي عمرك: انشدي وانت تطبخين او تشتغلين حتى لو صوتك شين يمكن يحلى مع الايام، ويمكن يعجب زوجك… حتى لو ما اعجبه نشيدي ولا عليك منه… اصلا يخب عليه صوتك الحلو… حاولي تستفزين زوجك بالمزح حتى لو ثقيل، غصبا عليه يقبله هو ووجهه، اذا عاب زوجك شي فيك قولي له اتحداك تلقى فيني عيب.. تحديه من جد وخلي جملتك واثقة… واذا عند معك وطلع عيوب الدنيا اللي فيك قولي له: ”ما لقوا في الورد عيب قالوا له ياأحمر الخدين” ترى قوية هالعبارة وتسكته لو طول لسانه مترين

5) اذا طلع عيب في اكلك قولي له وش عرفك باصول الطبخ الايطالي؟؟ يعني اي طبخة تخترب قولي له ايطاليه لان الاكل الايطالي كله بهار وملح ومعجون على بعضة واللي ما تصدقني تروح مطعم المذاق الايطالي… بالرياض.

المهم روقي عمرك الدنيا ماتسوى خلي الابتسامة ميزتك ولا تسوين ذكية وعصبية وعلى بالك كوندليزا رايس على غفلة، المهم طولت عليكم بس تلخيص كل هالهذرة:

الاستغفار+سورة البقرة+ذكرالله+الرواقة والاخلاق= حياة سعيدة باذن الله


منقول للفائدة

 

موقع الأسرة السعيدة


تنويه: يمنع نقل هذا المقال كما هو أو استخدامه في أي مكان آخر تحت طائلة المساءلة القانونية، ويمكن استخدام فقرات أو أجزاء منه بعد الحصول على موافقة رسمية من إدارة النجاح نت.



ساعدنا في تطوير عملنا وقيّم هذه المقالة


تعليقات الموقع